Undanfarið virðist hafa breiðst út sá misskilningur að vefir á Íslandi séu verri kostur en að hýsa vefi erlendis, sérstaklega fyrir þá sem eru að markaðssetja þjónustu sína erlendis, eins og t.d. ferðaþjónustuaðila. Þetta stafi af því að vefir á Íslandi séu almennt hægvirkari, það sé lengra til Íslands en innan þess lands sem markhópurinn er í o.s.frv.

Þessi misskilningur virðist allavega að einhverju leyti stafa frá námsefni í námskeiðum um markaðssetningu á Internetinu þar sem ýmsar staðreyndir eru túlkaðar á þennan veg. Námsefni sem hefur sést ber þetta með sér þar sem t.d. er verið að sýna á glærum og bera saman svartíma (pingtíma) til mismunandi staða frá netþjóni sem staðsettur er í Texas í Bandaríkjunum. Það sem er athugavert við þetta er að:

• Texas í Bandaríkjunum er tæplega sá staður sem ætti að vera að miða við. Nær væri að nota þá t.d. Hamborg í Þýskalandi enda mjög stór hluti markhóps íslenskara ferðaþjónustuaðila í Þýskalandi.
• Svartími (pingtími) segir ekkert til um hversu greitt samband er á milli staða. Í fyrsta lagi gagnast pingtími ekki til raunhæfra mælinga á svartíma nema á stuttum samböndum sem öll eru á hendi sama þjónustuaðila. Þetta stafar af því að ekki er um að ræða sömu samskiptaaðferð (e. protocol) og notuð er í vefsamskiptum, þ.e. svartími er mældur með ICMP en vefur er fluttur á TCP samskiptaaðferð. Þar sem álag er mikið, t.d. á bakbeinum netsambanda er ICMP umferð iðulega sett á lægri forgang en TCP og öll prófun í gegnum þann punkt því ómarktæk. Einnig er til þess að líta að þegar fleiri en ein leið er til staðar, sem er iðulega er pökkum oft víxlað á tengingar sem getur leitt til mismikilla tíma (e. flutter) þar sem pakkar raðast ekki allir sömu leið. Þess meira þéttbýli sem pakkar fara um, þess líklegra er að þetta gerist þar sem þessar aðferðir eru notaðar við að jafna út álagi á sambönd.
• ICMP svartími er vísbending um hvað tekur langan tíma að fara á milli tveggja punkta. Vísbending en ekki óskeikull mælikvarði.
• Svartímamælingar voru upphaflega og eru enn ætlaðar til að mæla svartíma milli neta. Ekki svartíma frá tölvu í tölvu. Svo mikið er um að þessi samskiptaaðferð sé notuð til netárása að endabúnaður notenda er orðið sjálfgefið stilltur á að svara ekki svartímamælingu. Netbúnaður hjá netveitum er einnig oft þannig stilltur (oft vegna vanþekkingar þeirra sem sjá um búnaðinn á tilgangi ICMP-umferðar) að ICMP umferð er álitin vera óumbeðin og óþörf umferð og annaðhvort sett í neðsta forgangsflokk eða jafnvel bönnuð sem er vissulega slæmt enda er tilgangur ICMP fyrst og fremst að athuga hvort samband er fyrir hendi, leiðrétta pakkastærðir, endurvísa umferð o.þ.h.

Aðferðir við að mæla gæði vefja

Til að mæla gæði vefs er best að notast við tól og gögn frá fleiri en einum aðila. Gögn frá hverjum og einum þurfa einnig helst að mæla frá fleiri en einum stað. Aðeins þannig getur maður verið nokkuð viss um að mögn frá mismunandi stöðum séu sambærileg því að þá er notuð sama aðferðafræði frá hverjum stað um sig. Einnig er gott að treysta ekki einungis einum aðila, heldur skoða gögn frá fleiri og bera saman til að fá vitræna niðurstöðu.

Það sem skiptir máli er upplifun notandans af vefnum

Hvað ræður gæðum vefja?

• Innihaldið þarf að vera áhugavert. Undir þetta fellur útlitshönnun og innihald (texti og myndir) vefsins.
• Framsetning efnisins þarf að vera bandvíddarvæn. Myndir mega ekki vera of stórar þannig að þær séu of lengi á leiðinni.
• Vefurinn má ekki valda óþörfu álagi. Skriptur (forritunarköll) mega ekki vera of þungar þannig að þær valdi of miklu álagi á vefþjón eða vefskoðara notandans. Köll í gagnagrunna þurfa að vera framkvæmd þannig að efnið sé sótt með sem minnstu álagi.
• HTML-forritun má ekki vera gölluð þannig að vefskoðari þurfi að ,,leiðrétta" form vefsíðna eða giska á hvernig þær eigi að vera formaðar.
• Tenging notandans við Internetið. Þetta er einn af þeim þáttum sem eigandi vefs getur engin áhrif haft á en auðvitað er rétt að hafa í huga við hönnun vefs að sumir notendur geta verið á lélegum tengingum og miða vefinn við það. Þá þarf ekki að hafa áhyggjur af þeim sem eru á betri tengingunum.
• Aðrir hlutir óupptaldir, t.d. uppitími og fjöldi sambanda, leiðstjórnun o.fl.

Hvaða tól er best að nota?

• Það er ekki hægt að svara þessarri spurningu tæmandi þar sem mismunandi áherslur fylgja mismunandi vefjum.
• Best er að byrja á því að meta sjálfur hver gæði mælingavefs eru gagnvart sjálfum þér. Ef vefurinn sem þú vilt nota er seinn upp og þungur, er einnig líklegt að hann mæli þinn vef seinan og þungan hvernig svo sem staðan er í raun.
• Notaðu tól sem mælir frá fleiri en einum stað. Þannig er best að gera sér grein fyrir því hvernig prófun kemur út frá mismunandi heimshlutum. Ekki reiða þig á einn mælingavef eða eitt tól.
• Þau mæligildi sem skipta máli eru að vefurinn sé ekki of stór, þ.e. fyrsta síðan sé samanlagt með myndum og öllu sem minnst. Ekki er hægt að nefna neinar fastar stærðir enda fer slíkt eftir efni vefs, en ágætt er að miða við að fyrsta síða sé ekki stærri en 200-400 kB. Hafa þarf í huga að þó að DSL-tengingar séu útbreiddar að þá er samt töluverður fjöldi sem en notast við innhringitengingar

Til að nefna einhver tól sem hægt er að nota má nefna: Webdeveloper viðbót (plugin) í Firefox vafrann. Þetta er lítið tól sem m.a. mælir stærð vefsíðu og hvernig innihald hennar skiptist. Í því má á auðveldan hátt sjá t.d. hvort einhver mynd er of stór. Til að setja inn 'plugin' í Firefox er valið 'Tools' -> 'Add-ons' og kemur þá up gluggi yfir þau 'plugin' sem eru virk. Ef WebDeveloper er ekki á listanum þá velja 'Get Extensions' og flytur vafrinn þig þá á vefsíðu þar sem þú getur leitað að viðbótum ('plugins') Skráðu inn 'Web Developer' í leitarreitinn og fylgdu leiðbeiningum. Þegar búið er að setja upp viðbótina þá er síðan sem mæla á skoðuð og valið í valborðanum sem viðbótin gerir 'Information' og 'View Document Size'.
Veftólið http://www.dotcom-monitor.com/task_hot_test.asp?id=1 (á heimasíðu vefsins má einnig velja ítarlegri próf). Athugið að próf geta tekið nokkra stund þar sem síðan er sótt ítrekað frá nokkrum stöðum.
Veftólið http://www.websiteoptimization.com/services/analyze/ er einnig með nokkur próf sem gefa upplýsingar um stærð og mögulegan sóknarhraða á síðum mv. mismunandi tengingar.
Athugið að til er fjöldi annarra tóla til að mæla síður og ber ekki að skoða vísun á þennan tiltekna stað sem yfirlýsingu um að hann sé sá eini marktæki. Einnig ber að geta þess að til að fá hlutlausa mælingu er best að endurtaka próf á mismunandi tíma sólarhrings þar sem álag á prófunartólunum og/eða samböndum getur verið misjafnt.

Er betra að vista vefi erlendis ef þeir eru ætlaðir til skoðunar erlendis?

Hér eru nokkrar fullyrðingar sem eru samt ekki tæmandi.
• Það er ekki til neinn einn sannleikur í þeim efnum.
• Vistunaraðilinn og tengingar hans við umheiminn skipta ekki minna máli en staðurinn.
• Fjöldi viðskiptavina hjá þjónustuveitanda skiptir máli. Þess fleiri viðskiptavinir, þess minni athygli fær hver og einn þegar kemur að þjónustu.
• Tengingar vistunaraðila við umheiminn skipta miklu máli en ekki síður hversu margir nota þær. Flöskuhálsar geta oft myndast ekki vegna þess að sambönd séu lítil, heldur vegna þess að of margir notendur nota sama búnaðinn.
• Landfræðileg staðsetning skiptir máli en ekki mjög miklu. Að því gefnu að búnaður ráði við þá umferð sem um hann fer og að bandbreidd sé næg þá ferðast umferð milli staða á ljóshraða sem er um 300.000 km. pr. sek. Það eru um 7½ umferð umhverfis hnöttinn á sekúndu. Það skiptir meira máli hvað eru margir leiðstjórar (routerar) á leiðinni sem farin er því þar reynir á afkastagetu.
• Íslenskar netveitur eru með mjög góðar tengingar við umheiminn. Hvað Snerpu varðar þá eru notuð sambönd frá Símanum og einnig Vodafone sem tryggir 'gott úrval' af leiðum milli landa. Landfræðileg staðsetning Íslands er mjög góð mitt á milli Evrópu og Ameríku þar sem tengingar eru í báðar áttir.
• Besti dómarinn á gæði vefja er notandinn. Ef þú ert í góðu sambandi við viðskiptavini þá er góð hugmynd að senda völdum aðilum beiðni um að 'taka út' vefinn þinn og gefa álit á því hvernig hann kemur út.

Snerpill.is er farinn að safna saman myndum héðan og þaðan af mannlífi og náttúru Vestfjarða. Er þetta gert til að lífga upp á síðuna. Vona að þessi nýbreytni eigi eftir að falla notendum síðunnar vel í geð. Er þetta einn þáttur í verkefninu "Vestfirðir á kortið" sem Snerpa ehf styrkir af heilum hug.

Hérna má nálgast myndaalbúmið.

Logo fyrir Snerpil eða Snerpu má nú finna í skráarstjóranum okkar. Er þetta sett þar í þeim tilgangi að ef einhver þarf á þessu að halda við grafíkgerð, að þá má nálgast þetta í öllum algengustu tegundum myndvinnslu skjala. Kemur þetta í veg fyrir að logoin okkar verði afskræmd á einn eða annann hátt.
Sniðugt er fyrir öll fyrirtæki sem kynna sitt starf eða þjónustu á netinu, að nota þessa aðferð og hafa þetta vel aðgengilegt svo að sem best ímynd komi fram af fyrirtækinu hvar sem logo þess er notað.